എരകപ്പുല്ല്

അപ്പൊക്കാലിപ്റ്റൊ സിനിമ കാണരുത്

2011-12-19T16:50:00.000-08:00

അപൊക്കാലിപ്റ്റോ എന്ന സിനിമയിൽ
ഒറ്റക്കുത്തിന് ഹൃദയം
പറിച്ചെടുക്കുന്ന കാഴ്ചയുണ്ട്.

ഇളംതൂവലുകളിൽ
ചോര പറ്റി അപ്പോൾ
തന്നെ പിറന്ന ഒരു
പക്ഷിക്കുഞ്ഞിനെപ്പോലെ
ഓമനത്തമുള്ള ഹൃദയം.

കൊഴുത്ത് കൊഴുത്ത്
വഴികളടഞ്ഞു തുടങ്ങിയതോ
വീർത്തു തുടങ്ങിയതോ ആയ
ധമനികളോടു കൂടിയ
ഹൃദയത്തിനു പകരം
ഇമ്മാതിരി തുടുത്തതൊന്ന്
പകരം വെക്കാമെന്നു്
തോന്നി കണ്ട മാത്രയിൽ.

(ലിംഗം വെട്ടിയെടുക്കുന്നത്
കാണിക്കുന്നില്ല; അല്ലെങ്കിൽ
അതും വെച്ചുപിടിപ്പിക്കാമോയെന്ന
ശരാശരിച്ചോദ്യം
വന്നേനെ നിന്നിൽ‍ നിന്നും)

ആത്മഹത്യചെയ്ത് ജീവിതം
കണ്ടെത്തുന്നവർ‍ ഈ സിനിമ
കാണരുതൊരിക്കലും;
വെച്ചുപിടിപ്പിക്കാവുന്ന
മിടിപ്പും ഉദ്ധാരണവും
ഓർമ്മയിൽ വന്നിട്ടെന്തു കാര്യം.

(തർജ്ജനിയിൽ പ്രസിദ്ധീകരിച്ചത്)

സ്തുതി

2011-12-11T02:04:00.000-08:00

ഒന്നായതൊക്കെയും

രണ്ടാക്കി

പലതാക്കി

കളങ്ങളാക്കി.

ഒത്തുകിട്ടിയാലൊരാളെ

ചോരയും മാംസവും

ചേർത്തൊന്നോടെ

തിന്നുകയും ചെയ്യും.

ചോരയും മാംസവും

വേർപെടുത്തി

രണ്ടു പാത്രത്തിലാക്കുവാൻ

മെനക്കെടില്ല..

മാംസത്തിന് ഒന്ന്

ചോരക്ക് ഒന്ന്

രണ്ടു പാത്രങ്ങൾ

കിട്ടാഞ്ഞിട്ടാണൊ..

മനുഷ്യനെന്നതിനു

പിന്നെയും സ്തുതി.

കടലൊച്ച

2011-10-25T12:43:00.000-07:00

മാധ്യമം ആഴ്ച്ചപതിപ്പിൽ

വന്ന ഒരു കവിത(ഒക്ടോബർ 24 -2011)

ദൈവത്തെക്കുറിച്ചുള്ള സംശയം

2011-09-23T17:33:00.000-07:00

കല്ലായ കല്ലുകളിലേക്കൊക്കെ
വിവർത്തനം ചെയ്യപ്പെട്ട ദൈവങ്ങൾ;
പ്രപഞ്ചം പുറപ്പെട്ടിടത്തുതന്നെ
തിരിച്ചെത്തണം ഇനി കല്ലുകളില്ലാതാവാൻ;
അതു വഴി ദൈവങ്ങളും.

ദൈവത്തെ ഒരു നാളൊരാൾ
കണ്ണാടിയിലേക്കു വിവർത്തനം ചെയ്തു;
അതിൽ പിന്നെയാരും കണ്ണാടി
കണ്ടിട്ടില്ലെന്നും തോന്നുന്നു.

ദൈവങ്ങളാകാത്ത
കല്ലുകൾകൊണ്ട് ആരും
കണ്ണാടിയുടച്ചിട്ടുമില്ല;
ഇനി ദൈവങ്ങളായ കല്ലുകൾ
ഇരുന്നിടത്തു തന്നെയിരുന്ന്
കല്ലെറിഞ്ഞു കണ്ണാടിയുടയ്ക്കുന്നുണ്ടൊ
ആവോ
-------------------------------------
മലയാളനാട് വാർഷികപ്പതിപ്പിൽ പ്രസിദ്ധീകരിച്ചത്

മഴ/കടല്‍

2011-09-12T03:53:00.000-07:00

ചേക്ക

2011-09-07T10:48:00.000-07:00

മുഖത്ത് വെളിച്ചം തട്ടുമ്പൊഴെ
കുതിച്ചെത്തുന്നു അഞ്ജാതമാം ഭയം;
നാക്കു ചുഴറ്റി ഉള്ളിലേക്കു
തന്നെ വീഴുന്നു വാക്കുകള്‍

എന്നെക്കാണാത്ത നേരമത്രയും
ഭയമേ എവിടെയായിരുന്നു നീ;
അറിഞ്ഞിരുന്നെങ്കിലവിടെ-
യാക്കാമെന്‍ ചേക്കയുമിനി.

വെളിച്ചത്തിലേക്കെന്തിന്നിറങ്ങണം
കുലുങ്ങിക്കിതക്കണം വെറുതെ
ഞാന്‍ മാത്രമറിഞ്ഞെന്തിന്നു
ചിണുങ്ങിത്തൂവണം കണ്ണീര്‍ .‍‍‍

ആള്‍ച്ചുമരുകള്‍ നോക്കിമറഞ്ഞു
നില്‍ക്കുവാന്‍ വയ്യിനി ഭയമേ;
ആരുമില്ലെന്ന തോന്നലുമില്ലല്ലൊ
നിന്നോടൊത്തു കൂടുമ്പോള്‍

നന്നങ്ങാടി

2011-08-02T18:21:00.000-07:00

ഭൂമിയിൽ

അവസാനം
മരിക്കുന്ന മനുഷ്യനെ
അടക്കുവാൻ
ആരുമുണ്ടാവില്ല.

അപ്പോൾ
ഭൂമി കുഴിയും
ആകാശം
മൂടിയും ആകും

ഭൂമി ഒരാൾക്കുള്ള
ശവപ്പെട്ടി
മാത്രം...

പ്രപഞ്ചത്തെ
പിന്നീടെപ്പോഴൊ
ആരൊക്കെയൊ
എവിടെയൊക്കെയൊ
ഇരുന്ന് കുഴിച്ചു കുഴിച്ചു
നോക്കുമ്പോൾ
ഭൂമിയും കാഴ്ച്ചയിൽ
പെടാതിരിക്കില്ല;
ഉള്ളിൽ ദഹിക്കാത്ത
കുറച്ചസ്ഥികളുമായ്
ഒരു നന്നങ്ങാടി.

------------

ബൂലോകകവിത

ഭാഗ്യം

2011-07-24T12:06:00.000-07:00

മുമ്പു വീശിപ്പോയ
ഒരു കാറ്റിനെ
സൂക്ഷ്മതയോടെ
വായുവില്‍ നിന്നും
അടര്‍ത്തുന്നുണ്ടൊരാള്‍
എവിടേക്കാണാവോ
ഇനിയിക്കാറ്റിനെ
ചേര്‍ത്തുവെക്കുക..

അനങ്ങണമെന്നു
നിശ്ചലം ഉള്ളില്‍
മുളയ്ക്കുന്നൊരു
തോന്നലിനെ
മുറിക്കുന്നുണ്ടയാള്‍;
എന്തു ഭംഗിയെന്നു
കവിതയും
കുറിക്കുന്നയാള്‍ ...

ഭാഗ്യം;
ഒരു നക്ഷത്രക്കുതിപ്പിന്‍
തോന്നലിനെ മുറിക്കുന്നില്ലയാള്‍
അതും നോക്കിയിരിക്കും
കുഞ്ഞിക്കണ്ണിന്നനക്കം
മുറിഞ്ഞുപോയേനെ ...

-----------------
തർജ്ജനി

നിശ്ശബ്ദം..

2011-07-11T03:10:00.000-07:00

നിശ്ശബ്ദതയുടെ
നദിയിലൂടെ പോകുമ്പോൾ
തുഴ വീഴുന്ന
ശബ്ദം മാത്രം..

ഇത്തുഴയും
വീഴുമൊച്ചയില്ലെങ്കിൽ
ഇതിലും നിശ്ശബ്ദമായേനെ
ജീവിതം..

കവിത

2011-05-21T13:25:00.000-07:00

നിഴലടർത്തി തിന്നുന്ന
നായ്ക്കളുടെ കാലത്ത്
കവിത ഒറ്റപ്പെട്ടവന്റെയല്ല;
അരപ്പെട്ടവന്റെ സഞ്ചാരമാണ്...

ജലവിരലുകൾ

2011-04-30T05:56:00.000-07:00

എന്റെ നെറ്റിയിൽ തൊട്ട
നിന്റെ വിരലുകൾ
ജലത്തിൽ ജലമൊഴിച്ച്
കുഴച്ചുണ്ടാക്കിയതല്ലെ;
അല്ലെ ?
അതല്ലെ ഇപ്പോഴും
ഞാൻ തണുത്തിരിക്കുന്നത്;
അല്ലെ ?

ജലവിരലുകൾ
എന്നു ഞാൻ വിളിക്കട്ടെ?

അളവ്

2011-04-10T12:50:00.000-07:00

എത്ര കാലം
കണ്ടിരിക്കും
ആകാശവും കടലും.

ഒരു നാൾ
ആകാശം കൈകള്‍ നീട്ടി
കടലിനെ പൊക്കിയെടുക്കും.

പ്രണയമല്ലേ.
പതിവു പോലെ മടുക്കും.

കുറച്ചു കാലം
ഏകാന്തത അനുഭവിക്കട്ടെ
എന്ന് കരുതി
മരുഭൂമിയില്‍
കൊണ്ടിടും കടലിനെ.

ചിലപ്പോഴെങ്കിലും
മരുഭുമിയില്‍
കടലുകള്‍ ഉണ്ടാകുന്നത്
ഇങ്ങിനെയാണ്.

ഒരു നിശ്ശബ്ദതയുടെചുറ്റളവ്
കൃത്യമായി അളക്കുവാൻ
കഴിയാത്തതുപോലെ
കടലിന്റെ
ഏകാന്തതയും
അളക്കുവാൻ സാധ്യമല്ല.

കിടങ്ങ്

2011-04-10T00:40:00.000-07:00

മണ്ണിലേക്കു
താഴ്ത്തിക്കെട്ടിയ
ജലവേലി.

നിരാകാരം

2011-04-04T02:21:00.000-07:00

ഉള്ളിലാരോ ഒട്ടിച്ചുകൂട്ടുന്നു
ഒന്നുമില്ലാത്ത ഇടങ്ങള്‍
പിന്നെയും.

എവിടെയും നീയില്ല
ഇല്ലാത്തൊരാകാരം
നിനക്കെത്ര നാള്‍.

ഒട്ടിച്ചുകൂട്ടിയ
ഒന്നുമില്ലാത്ത ഇടങ്ങള്‍
തുന്നിക്കൂട്ടിയെടുത്ത്
ഒന്നാക്കണം.

അപ്പോഴേക്കും
കാറ്റായ് നീ
പറന്നു പോകൊലാ.

രക്ഷ

2011-03-22T23:18:00.000-07:00

ഇരക്കു പിന്നില്‍ മറഞ്ഞിരുന്ന്
ഉള്ള ശബ്ദങ്ങളൊക്കെയും
വലിച്ചെടുക്കും വ്യാഘ്രം;
ആഞ്ഞുചാടലിന്‍
വേഗം കൂട്ടാന്‍.

ശബ്ദത്തിന്റെ കാടുണ്ടാക്കി
ചാടുമ്പോള്‍
ഇരയുടെ ഉള്ളിടിഞ്ഞ്
ഉള്ളിലേക്കു തന്നെ
വീഴണം.

ഇരയ്ക്കു മുകളില്‍
അര്‍ദ്ധനിമിഷത്തെ
വ്യാഘ്രപ്പന്തല്‍.

കുതിപ്പു കൂടിയാവണം
ഇരയേയും കടന്ന് നിലംകുത്തി
വീണു വ്യാഘ്രം;
തിരിഞ്ഞു
നോക്കിയതും,
ഇരയില്ല.

ബൂലോകകവിതയില്‍ പ്രസിദ്ധീകരിച്ചത്

വവ്വാല്‍

2011-03-16T21:44:00.001-07:00

രാത്രിയില്‍
പഴങ്ങള്‍ തിന്നുവാനെത്തും
വവ്വാലറിഞ്ഞില്ല
പഴം കായ്ക്കും മരം
പകല്‍ വെട്ടിപ്പോയത്.

മരം നിന്നിടത്ത്
പഴമില്ല ഇലയില്ല
താഴേക്കുവലിക്കും ശൂന്യത;
വട്ടം കറങ്ങി
പറന്നു പോയ് വവ്വാല്‍.

തെല്ലിട കഴിഞ്ഞ്
ഒന്നുകൂടി വന്നു
വട്ടം പറന്നു വവ്വാല്‍.

പ്രാര്‍ത്ഥനകളുടെ അത്താണി

2011-03-09T02:20:00.000-08:00

വംശം രേഖപ്പെടുത്താതെ പോയ
ഒരു ജീവിയുടെ
അവസാനപ്രാര്‍ത്ഥന
ദൈവവഴിയില്‍
ഇടയ്ക്കു വച്ച് നിശ്ചലമായ്.

അത് ഉറഞ്ഞുറഞ്ഞ്
ഒരത്താണിയായ് തീര്‍ന്നു;
ദൈവത്തിലേക്കു പോകുന്ന
പ്രാര്‍ത്ഥനകള്‍ക്കു മാത്രം
കാണാവുന്നതും
ഇരിക്കാവുന്നതുമായ്
നിലകൊണ്ടങ്ങിനെ..

ഇല്ലാച്ചിറകുകള്‍ കുടഞ്ഞ്
ഇല്ലാക്കാലുകളിലിരുന്ന്
മിഴികളില്ലെങ്കിലുമടച്ച്
അത്താണിയില്‍ ഇളവേല്‍ക്കും
പ്രാര്‍ത്ഥനകള്‍.

പിന്നെ പറന്നേറാനുള്ള
ഊര്‍ജ്ജമാകുന്നതോടെ
പ്രാര്‍ത്ഥനകള്‍ യാത്രയാകും
ഓരോ പ്രാര്‍ത്ഥനയും
ഇളവേറ്റ് പോകുമ്പോഴും
ഉറഞ്ഞുറഞ്ഞ് അത്താണി.
-----------------------
ബൂലോകകവിതയില്‍ പ്രസിദ്ധീകരിച്ചത്

സുഷുപ്തികള്‍ മൂന്ന് തുരീയം ഒന്ന്

2011-03-01T20:50:00.000-08:00

അകലെ നിന്നു നോക്കുമ്പോള്‍
താഴേക്കു കുത്തിയിറക്കിയ
കരിനിഴല്‍ പോലെയും
വയറുകീറി ചാക്കില്‍ കെട്ടി
കൊണ്ടിട്ട് കൊണ്ടിട്ട്
ശവപ്പേടി മാറിയും
കൊക്കാലക്കുളം.

കുളമെത്തും മുന്‍പ്
വളവിന്നിടതുഭാഗത്തുള്ള
സൈന്‍ബോര്‍ഡ് കടയില്‍
ജോലി ചെയ്യും നിര്‍മ്മലച്ചേച്ചി
വെറുതെ വിചാരിക്കും
ഏഴമ്പത് മുന്നൂറ്റമ്പതും
ഞായറും കിഴിച്ച് മുന്നൂറ്;
ഞായറില്ലെങ്കില്‍
ആയിരത്തഞ്ഞൂറായ്
തീരുമെന്‍ മാസശ്ശമ്പളം;
നാടാരുടെ അരിക്കടക്കണ-
ക്കെഴുത്തുകാരിയാം
അനിയത്തിക്കുണ്ട്
ആയിരത്തിയെണ്ണൂറ്.

മൈക്കയും അക്രിലിക് ഷീറ്റും
മുറിക്കും വട്ടവാള്‍ക്കറക്കത്തില്‍
പെട്ടുപോകും വിരലുകളില്‍
പച്ചുള്ളി ചതച്ചു വച്ചു
ഉണക്കിയതിന്‍ പാടുകള്‍
പുതുക്കപ്പെടുന്നുണ്ടിടക്കിടെ.

സന്ധ്യയാകുമ്പം വീട്ടിലെത്തേ
പ്രായമായൊരമ്മതന്‍'കുസൃതികള്‍'
കാണ്‍കെ ഗുണദോഷിച്ചും
ശകാരിച്ചും നിര്‍മ്മലച്ചേച്ചി.

കൊട്ടന്‍ചുക്കാദിയും
കര്‍പ്പൂരാദിത്തൈലവും ചേര്‍ത്ത്
സന്ധികളില്‍ തേച്ചും
ചുടുവെള്ളത്തിലൊരു കുളിയും
നിര്‍മ്മലച്ചേച്ചിയുടെ പതിവുകള്‍;
പിന്നെ മൂന്നുപേര്‍ ചേര്‍ന്ന-
ത്താഴം കഴിച്ചു കിടക്കുന്നു.

ഉറക്കം വരാതെ നിര്‍മ്മലച്ചേച്ചി
വെറുതെ കിടക്കുമ്പോള്‍
നാല്പതു കഴിഞ്ഞ അനിയത്തിയും,
അമ്മയും കൂര്‍ക്കം വലിക്കുന്നു;
പിന്നെയെപ്പോഴൊ
നിര്‍മ്മലച്ചേച്ചിയും
ഒപ്പം വലിക്കയായ്.

മൂന്നുപേര്‍ചേര്‍ന്നുള്ള സുഷുപ്തിയില്‍
മൂന്നു പേര്‍ ചേര്‍ന്ന് ഒറ്റ തുരീയവും;
എന്തൊരത്ഭുതം ദൈവമേ !.

-------------------

കൊക്കാല:തൃശൂര്‍ റെയില്‍വേസ്റ്റേഷന്‍ ഉള്‍പ്പെടുന്ന സ്ഥലം
മലയാളകവിതയില്‍ പ്രസിദ്ധീകരിച്ചത്

ഒഴുകിപ്പോകണേ..!

2011-02-14T23:43:00.000-08:00

മനുഷ്യശരീരം
വിയര്‍ത്തു വരുമ്പോള്‍
അതില്‍ നിന്നും ഉപ്പുണ്ടാക്കാ-
മെന്നൊരവസ്ഥയില്ലല്ലൊ;
അതു നന്നായി.

അതല്ലെങ്കില്‍
ചില മനുഷ്യര്‍
ഉപ്പുവെള്ളത്തേക്കാള്‍
വില കുറഞ്ഞവരായതിനാൽ
ചിലപ്പോള്‍ ശിക്ഷിച്ചും
വെയിലത്തു നിര്‍ത്തിയും
കിടത്തിയും വിയര്‍പ്പിച്ച്
ശരീരത്തില്‍ നിന്നും
ഉപ്പുകല്ലുകള്‍ അടര്‍ത്തിയെടുത്തേനെ;
വേറേയും മനുഷ്യര്‍.

മനുഷ്യരില്‍ നിന്നും
ഉപ്പടര്‍ത്തരുതെന്ന
നിയമം വരുമെങ്കില്‍ കൂടി
വിയര്‍പ്പ് എപ്പോഴും
ഒഴുകിപ്പോകണേ..!.

അല്‍ഷിമേഴ്സ്

2011-01-10T04:03:00.000-08:00

തലയ്ക്കുള്ളില്‍ നിന്ന്
ഓര്‍മ്മകളിടിഞ്ഞ്
ശരീരത്തിനുള്ളിലേക്കു
വീഴുന്നു.

ഓര്‍മ്മ മാംസവുമായി
കൂടിച്ചേര്‍ന്ന്
വീഴ്ച്ചയില്‍ ദഹിച്ചവരെ
പ്പോലെയും
ഒരിക്കലും
എഴുന്നേല്‍ക്കാത്തവരെ
പ്പോലെയും.

വല്ലപ്പോഴെങ്കിലും
വീഴ്ച്ചയില്‍ നിന്നും
എണീല്‍ക്കുന്നുവെന്ന
തോന്നലിന്‍ കണ്ണീര്‍പ്പൊട്ട്
തലയിലേക്കെത്തുന്നു;

കണ്ണുകളെപ്പോഴും
തീക്കുടങ്ങള്‍ പോലെയൊ
ജലാശയം പോലെയോ
ആകാതിരുന്നിട്ടും.

മൂന്നാംപക്കം

2011-01-06T03:29:00.000-08:00

എഴുതിപ്പിടിപ്പിച്ച
ജനലഴികളിലൂടെ
നോക്കി നില്‍ക്കുന്നു;

രണ്ടായിരത്തിപ്പത്ത്
രണ്ടായിരത്തിപ്പതിനൊന്നില്‍
മുങ്ങിയിട്ട് മൂന്നാംപക്കം.

ജനല്‍ക്കരയില്‍
ഒന്നുമില്ല;
മരിച്ചവര്‍ അകന്നകന്നു
പോകുമ്പോല്‍
രണ്ടായിരത്തിപ്പത്തും.

ജനല്‍ക്കരയിലേക്ക്
എഴുതിക്കഴിഞ്ഞ
കടലാസ്സ് വലിച്ചെറിഞ്ഞു;
രണ്ടായിരപ്പത്തിന്റെ
ചരമക്കുറിപ്പ്.

ഇടിഞ്ഞിടിഞ്ഞ്

2011-01-03T23:52:00.000-08:00

ഷാര്‍ജയിലെ നിന്റെ വില്ലയിലെ
മതിലിനിപ്പുറം
റോഡരികു നിറയെ വേപ്പുമരങ്ങള്‍;
രാത്രിയിലും അതിന്റെ ചുവട്ടിലെ നില്പില്‍
ഹരിതം നമ്മളില്‍ കലരുന്നുണ്ടോയെന്ന
തോന്നല്‍.

റോഡിനപ്പുറം നിശ്ശബ്ദതയ്ക്ക്
മതിലുകെട്ടിയയിടം;
പനകള്‍ ,മരുഭൂമിയിലെ
പേരറിയാമരങ്ങള്‍
തിങ്ങി നില്‍ക്കുന്നു.

രണ്ടാള്‍പൊക്കത്തില്‍ നിന്ന്
രണ്ടുടലായ് വേര്‍പെടും
ഒരു മരത്തെ കാട്ടി നീ;
മരുഭൂമിയിലെ
മരങ്ങളുടെ ഏകാന്തത
കാണുമ്പോള്‍
അവയ്ക്കെല്ലാം ഓരോ
കഥയുണ്ടെന്നും
അക്കഥയെല്ലാം നിനക്കറിയാമെന്നും
എനിക്കു തോന്നാറുണ്ട്.

ഒരു പനയുടെ പട്ടയുയര്‍ത്തി
അര്‍ബുദം വന്ന ഒരാളെ
അടുത്തു നിര്‍ത്തി കാണിക്കുന്ന
വേദനയോടെ അതിന്റെ
ഉണക്കശ്ശിരസ്സു നോക്കാന്‍ എന്നോട്.

പനകളുണങ്ങുമ്പോള്‍
ശിഖരങ്ങളിടിയുമ്പോള്‍
ഉള്ളില്‍ അര്‍ബുദത്തിന്റെ
വേദനയുള്ളവനേ;
നീ ഇടിഞ്ഞിടിഞ്ഞ്
തീരുന്നതും നോക്കി
എത്ര മരങ്ങളാണു
കാത്തു നില്‍ക്കുന്നത്,
പൊട്ടിക്കരയാന്‍.
--------------------
ബൂലോകകവിതയില്‍ പ്രസിദ്ധീകരിച്ചത്

മരമെന്നാല്‍ ഏകാന്തതയാണ്‌

2010-12-21T21:14:00.000-08:00

മരത്തിനെ ഏകാന്തതയെന്നു
വിളിക്കട്ടെ.

മരത്തിന്റെ ഏകാന്തതയോളം
വരില്ല മനുഷ്യന്റെ ഏകാന്തത.

ഏകാന്തതയുടെ കൊമ്പും ചില്ലയും
തടിയും ഒടുക്കം കടയോടെ
മുറിച്ചിട്ടിട്ടും തീരുന്നില്ല;

കട്ടിള ജനല്‍ ഉത്തരം കഴുക്കോല്‍
ഇവയൊക്കെയായി
മാറുമ്പോഴും
പിന്നെയും നീളുന്നു
ഏകാന്തത.

എത്രയോ കഴിഞ്ഞാണ്‌
ഏകാന്തതയെ തീയെടുക്കുന്നത്.

ആഴം

2010-12-19T06:46:00.000-08:00

ഇന്ന് എന്നത്
ഒരു കിണറിന്റെ
മുകൾ വശമാണ്‌.

ഇന്നലെകൾ
അതിന്റെ ആഴവും;
കിണറിന്നടി
ആകാശം വച്ചടക്കാത്തതിനാൽ
ചൂഴ്ന്നു ചൂഴ്ന്നു-
പോകുന്നുണ്ട് ആഴം.

കണ്ണും കിണറുപോലെ-
ത്തന്നെയാണ്;
ഇന്നലെയുടെ
സൂക്ഷ്മവട്ടങ്ങൾ
ആഴം ചൂഴ്ന്നു ചൂഴ്ന്നു
പോകുന്നുണ്ട് കണ്ണിലും.

കണ്ണുകളിൽ
ചുംബിക്കുമ്പോൾ
ആഴം താഴേക്കു പിടിച്ചു
വലിക്കുന്നതായി
അനുഭവപ്പെടാറുണ്ട്

------------------
പുതുകവിതയില്‍ പ്രസിദ്ധീകരിച്ചത്.

ന്യായം

2010-12-12T23:47:00.000-08:00

ഉള്ളിലെ മൃഗത്തെ
വേലിപ്പഴുതിലൂടെ കടത്തി
കുടുക്കി
കാലിലടിച്ചും
തലയ്ക്കടിച്ചും;
പുളയുന്നുണ്ട് മൃഗം.

മൃഗമിടക്കിടെ
നിഴലിന്മേല്‍ നിഴല്‍ വീണ
അതിലും നിഴല്‍ വീണ
കാടു കാണുന്നു
കുതിക്കുന്നു പിന്നെയും

കാടല്ലെ
പണ്ടത്തെ വീടല്ലെ
എന്നൊക്കെ
ന്യായങ്ങള്‍ നിരത്തിയും.

----------------

ബൂലോകകവിതയില്‍ പ്രസിദ്ധീകരിച്ചത്

മരിച്ചവര്‍ക്കുള്ള പൂക്കള്‍

2010-12-03T21:56:00.000-08:00

പൂക്കള്‍
ഉച്ഛ്വസിക്കുന്ന
വായുവെ
ശ്വസിച്ചീടുന്നു
ആത്മാക്കള്‍.

അരോചകം

2010-12-01T00:09:00.000-08:00

ഒരൊച്ചയും
മൗനത്തിലേക്കു
വളരുന്നില്ലല്ലൊ.

ചില നേരങ്ങളില്‍
ഓര്‍മ്മയിലും
ഉറക്കത്തിലും
ചെമ്പു കീറുമ്പോലു-
ള്ളൊരൊച്ചയുണ്ടാകുന്നു.

മേഘങ്ങളിലും
വായുവിലും ചവിട്ടി
ദൈവം ഭൂമിയിലേ-
ക്കിറങ്ങുന്നുണ്ട്.

ചെമ്പു കീറുന്നൊരൊച്ച
ദൈവത്തിനരോചക-
മാകുമോയെന്തൊ;
നിന്നെപ്പോലെ?.

പഴയ വീട്

2010-11-21T03:57:00.000-08:00

കുഴഞ്ഞു കൂടിയിട്ടുണ്ട്
കൂട്ടിപ്പിടിച്ചിട്ടുണ്ട്
എന്നിട്ടുമറിയുന്നില്ല;
പകരുന്നുമില്ല
ഉള്ളിലെച്ചൂടിനെയു-
മിരുവരും.

പകരാച്ചൂടിനിപ്പോള്‍
ജടപിടിച്ചിരിക്കും;
ജടയോ, അതിലിപ്പോള്‍
ചിതലും കേറാം.

പുതുക്കാറില്ല വീടിനെ
വെള്ള കാണാറുമില്ല,
പോതുള്ള കഴുക്കോലും
പൊട്ടിയ തറയും.

ചിലപ്പോഴൊക്കെ
ഇഴഞ്ഞെത്തും ചിതലും
കടിച്ചുണര്‍ത്താറുണ്ട്
ഇരുവരേയും.

--------------------------
ആനുകാലികകവിതയില്‍ പ്രസിദ്ധീകരിച്ചത്.

മഴ/കടല്‍

2010-11-12T22:38:00.000-08:00

മേഘങ്ങളില്‍
ജീവിച്ചിരിപ്പുണ്ട് മഴ.

മഴയെന്ന് നമ്മള്‍ പറയുന്നത്
ഭൂമിയിലേക്കുള്ള അതിന്റെ
ജഡമൊഴുക്കിയുള്ള
സംസ്കാരയാത്രയെയാണ്‌.

മണ്ണില്‍ താഴ്ന്നു താഴ്ന്നു
പോകുന്നുണ്ട്..;
കെട്ടിക്കിടന്നാലുംഭൂമി മഴയെ
സംസ്കരിക്കുവാന്‍ ശ്രമിക്കുന്നുണ്ട്.

ഭൂമിക്കുള്ളിലേക്കിറങ്ങിപ്പോകുവാന്‍
കഴിയാതെ
മണ്ണിനും മറയിടാന്‍
കഴിയാതെ
ഭൂമി മുക്കാലും നിറഞ്ഞ്‌
സംസ്കരിക്കുവാന്‍
കഴിയാതെവന്ന
മഴയുടെ ജഡമാണ്‌ കടല്‍.

മയില്‍പ്പെട്ടി

2010-11-10T01:58:00.000-08:00

നിറങ്ങളെ വെക്കുന്നതിന്‌
ഒരു പെട്ടിയുണ്ട്
അതില്‍ പേരെഴുതണം
''നീ ഒരു പേരു പറയൂ''

''നിറങ്ങളുടെ പെട്ടി
മയില്‍പ്പെട്ടി''

രാത്രിയില്‍ ഒരു കള്ളന്‍ വന്നു;
നേര്‍ത്ത വെളിച്ചം തെളിച്ച്
ആദ്യം കണ്ടത്
മയില്‍പ്പെട്ടി.

ഉള്ളില്‍
മയിലാകാം
മയിലെണ്ണയാകാം
പീലിയാകാം;
കള്ളന്‍ വിചാരിച്ചു.

ചിരിച്ചോടും മത്സ്യങ്ങളേ !

2010-11-03T01:27:00.000-07:00

സൈകതം ബുക്സ് പ്രസിദ്ധീകരിക്കുന്നു

ചിരിച്ചോടും മത്സ്യങ്ങളേ !

പ്രകാശനം നവംബര്‍ പതിനാലിനു്‌ തൃശൂര്‍

കേരള സാഹിത്യ അക്കാദമിയില്‍ വെച്ച്.
കവി അന്‍വര്‍അലി വിഷ്ണുപ്രസാദിനു നല്‍കി
നിര്‍വ്വഹിക്കുന്നു.

അയ്യപ്പന്‌

2010-10-22T22:23:00.000-07:00

ആദരാഞ്ജലികള്‍..

പകരം

2010-09-27T02:10:00.000-07:00

നിന്റെ നിഴലിനെ
പരിഭാഷപ്പെടുത്തിയപ്പോഴാണ്‌
ചെമ്പകപ്പൂവിന്റെ ഗന്ധം
എനിക്കുചുറ്റും
നിറഞ്ഞു തൂവിയത്..

ഒന്നുമെടുക്കാതെ
കാറ്റോ ഒഴിഞ്ഞു നിന്നു.

ഒഴുകിയെത്തിയ ഒരരുവിയില്‍
നിറയെ ചെമ്പകഗന്ധം
നിറച്ചൊഴുക്കുകയാണ്‌ ഞാന്‍;
നീ ചിരിച്ചതാണെന്നറിയാതെ.

നീ തന്നതല്ലാതെ
എനിക്കൊന്നുമില്ലല്ലൊ
പകരം തരാന്‍.

----------------------------
പുതുകവിത ഓണപ്പതിപ്പില്‍ വന്നത്

കാട്ടുകാഴ്ച

2010-09-21T04:42:00.000-07:00

അതുവരെ
നിശ്ശബ്ദമായിരുന്ന കാട്
ഖണ്ഡം ഖണ്ഡമായ്
ചിതറുന്നു.

ഒരു മാന്‍പേടയെ
സിംഹം കൊല്ലുന്നതു
കാണാന്‍ ഇന്ദ്രിയങ്ങള്‍
പായുകയാണ്‌.

പ്രാണഞരമ്പില്‍
പല്ലുകളമരുമ്പോള്‍
അടിമുതല്‍ തിന്നുകേറുന്നു
സിംഹക്കുട്ടികളും.

പിന്നെയും
പഴയ നിശ്ശബ്ദതയില്‍
നഖം താഴ്ത്തിനില്‍ക്കുന്നു
കാട്.

--------------------------
തര്‍ജ്ജനി മാസിക

പകുക്കല്‍

2010-09-14T03:27:00.000-07:00

പൂക്കള്‍ക്കു
ചിറകു മുളയ്ക്കുമ്പോള്‍
ആദ്യകുടച്ചിലില്‍
തലേന്നേറ്റ മഞ്ഞുമണികള്‍
ഉതിര്‍ന്നു വീഴുന്നതും
നിനക്കു തന്നെയാകണേ..!
----------------
ബൂലോകകവിത

രാമ..രഘുരാമാ..!

2010-09-07T05:21:00.000-07:00

ചുളിവുകളറ്റ ഇളകാത്ത
തേച്ചെടുത്ത വായു നിറഞ്ഞ
ഹൈപ്പര്‍മാര്‍ക്കറ്റിന്റെ
രുചികളുടേയും
നിറങ്ങളുടേയും
ഗന്ധങ്ങളുടേയും
പൂര്‍ണ്ണസ്വാതന്ത്ര്യത്തിലൂടെ
നടന്നും ഉരുട്ടിയും
നേരം പോക്കുമ്പോള്‍
കണ്ടു മുട്ടുന്നു നമ്മള്‍.

സ്ഫടികമായ് മിനുങ്ങുന്നു
നിന്നിണതന്‍ മുഖം
മകനൊ നിന്നും നടന്നും
മൊബൈലില്‍ കളിയോടു കളി
മകള്‍ ശാസ്ത്രജ്ഞയെപ്പോലെ
ചിന്തിച്ച്.

നീയോ കണ്ട മാത്രയില്‍
ചിരിയോടു ചിരി
ഒരു കാടിന്‍ നിശ്ശബ്ദത
നെനഞ്ചിലുണ്ടായിരുന്നവന്‍
ഒരു വാക്കുതിരും മുന്‍പെ
എന്തൊരു ചിരി
പിരിയാന്‍ നേരവും
രാമ..രഘുരാമാ
എന്തൊരു ചിരി..!

----------------------
ബൂലോകകവിത ഓണപ്പതിപ്പില്‍ വന്നത്

ധ്യാനം

2010-08-27T23:42:00.000-07:00

കണ്ട കാഴ്ച്ചകളെ
തിരിച്ചെടുക്കുവാന്‍
കണ്ണുകളടയ്ക്കുന്നു;
ഒച്ച വെച്ചു പോയ വാക്കുകളേ
മൗനത്തിന്റെ കൂടുണ്ടാക്കട്ടെ
തിരികെ കേറുമോ.
---------------------
ആനുകാലികകവിത ഓണപ്പതിപ്പില്‍
വന്നത്

ജലം കൊണ്ടു പണിത വഞ്ചി

2010-08-10T00:08:00.000-07:00

മരുഭൂമിയുടെ
ഏറ്റവും വലിയ
സ്വപ്നം ഇതായിരിക്കും;
ഒരു വഞ്ചി
അതും ജലം കൊണ്ടു
പണിതത്
സ്വന്തമായി കിട്ടുക.

മരുഭൂമി കടക്കുന്ന
ഓരോ യാത്രക്കാരനോടും
പറയണം:
ഞാന്‍ കൊണ്ട വെയില്‍
നിനക്കുള്ള ജലം..

അതിനാലായിരിക്കും
കിട്ടും വരെ
വെയിലുകൊണ്ടിങ്ങിനെ..

ശേഷം

2010-07-16T21:54:00.000-07:00

ശരീരത്തില്‍ നിന്നും
ഊരിവീണ
രക്തഞരമ്പുകള്‍
പുഴുക്കളെപ്പോലെ വളഞ്ഞ്
രണ്ടറ്റവും ചീഞ്ഞ്
നെഞ്ച് ചീഞ്ഞ്
പുളയ്ക്കുന്നു.

പ്രണയം ഉള്ളില്‍
കടന്നതാണ്‌.
--------------------------
''ബൂലോകകവിത''യില്‍ പ്രസിദ്ധീകരിച്ചത്

കളവുമുതല്‍

2010-07-04T06:19:00.000-07:00

ശ്മശാനം തിന്നുന്ന
ജീവികളുണ്ടോ?
ഇക്കണ്ട മനുഷ്യരൊക്കെയും
ഒടുങ്ങിത്തീര്‍ന്നിട്ടും
ശ്മശാനങ്ങളുടെ
ശേഷിപ്പുകള്‍ ഇത്രയും
മതിയോ?

തിന്നു തീര്‍ത്തിട്ടുണ്ട്
തിന്നുന്നുമ്മുണ്ട്
ശ്മശാനങ്ങളെ .

മണ്ണ് കീഴ്മേല്‍ മറിച്ചിട്ടാലും
കണ്ടെടുക്കുവാന്‍ കഴിയാതെ
ഒളിപ്പിച്ചു വെച്ച
കളവുമുതല്‍ പോലെ ചില
ശ്മശാനങ്ങള്‍.
------------------------------------
''പുതുകവിത''യില്‍ പ്രസിദ്ധീകരിച്ചത്

ചാട്ടം

2010-04-19T23:18:00.000-07:00

കപ്പലില്‍ നിന്നൊരാള്‍
കാണാതായെന്നറിഞ്ഞതും
നാഴികകള്‍ക്കപ്പുറം
നിഴലുപോലെന്തോ
കടലില്‍ വീഴുന്നത്
കണ്ടുവെന്നൊരാള്‍.

ഡക്കില്‍ ഊരി വച്ചി-
ട്ടുണ്ടുടുപ്പുകള്‍, വാച്ചും
വീണ നേരം ഗണിച്ചു
കപ്പല്‍ പുറകോട്ടെടുത്ത്
നിര്‍ത്തി തിരച്ചിലായ്‌.

ബംഗാള്‍ഉള്‍ക്കടലിന്‍
നടുക്കെത്തിയത്രേ;
ഇരുള്‍ വീണു
മുങ്ങും സന്ധ്യയില്‍
ചുറ്റും കറുപ്പിന്‍ പരപ്പ്.

ലൈഫ്ബോട്ടില്‍
കോരിയെടുത്ത-
ടുക്കുന്നുണ്ട്
നടുക്കടലിനും
വേണ്ടാത്ത ജന്മത്തെ.

--------------------------

''സൈകതം'' മാസികയില്‍ പ്രസിദ്ധീകരിച്ചത്

നക്ഷത്രമൊഴി

2010-04-05T00:36:00.000-07:00

നക്ഷത്രം മൊഴിയുന്നു:
ഈയിരുട്ടും പോയ്മറയും
ഇനി പകല്‍ച്ചൂടേറ്റ്
പൊള്ളണം ഉടലാകെ.

ഒറ്റനിറം

2010-03-18T06:46:00.000-07:00

പാളങ്ങള്‍ക്കിരുപുറങ്ങളിലെ
നാറും തെരുവുകള്‍ക്കരികിലെ
മനുഷ്യവിസ്സര്‍ജ്ജ്യം പോലെയാണു്
ഓടയില്‍ കുളിക്കുന്നവരുടെ ജന്മം.

കുളികഴിഞ്ഞ്
അരയോളം വെള്ളത്തില്‍
ഇറങ്ങി നിന്ന് പിഴിഞ്ഞു തുവര്‍ത്തും
തുണിക്കും ഉടലിനും
ഒരേ നിറം.

നേരഭേദം മറന്നു്
അലച്ചുറങ്ങുമ്പോഴും പൊതുശ്മശാനം
അടുത്തില്ലെന്ന ഭയവുമില്ലവര്‍ക്കു്.

ഒന്നിനെത്തന്നെ

2010-02-28T23:07:00.000-08:00

ഭാഷാപോഷിണി
ഫെബ്രുവരി 2010

ഉപേക്ഷിക്കല്‍

2010-02-12T23:26:00.000-08:00

നമ്മളുപേക്ഷിച്ചില്ലെങ്കിലും
പിന്നീടതു നടന്നേക്കുമെന്ന
ഓര്‍മ്മ മാത്രമുള്ളതിനാലാവാം
ഉപേക്ഷിച്ചു പോരുക
ഉപേക്ഷിച്ചോടുക എന്നതെല്ലാം
വീണ്ടും വീണ്ടും ആവര്‍ത്തിക്കുന്നത്.
വിഘ്നമില്ലാത്ത മറവിയാണു
മരണമെന്നു പറയുമ്പോള്‍ തന്നെ
വിഘ്നമില്ലാത്ത ഈ ഉപേക്ഷിക്കലും
ചെറിയ ചെറിയ മരണങ്ങള്‍
തന്നെയാണല്ലെ ചങ്ങാതി;
വലിയ ഒന്നിലേക്ക്
ചെറിയ ഒന്നുകൊണ്ടുള്ള
അളക്കല്‍.

ശിഷ്ടം

2010-01-26T23:04:00.000-08:00

(കലാകൗമുദി ലക്കം1792)
ഈ കവിത പ്രസിദ്ധീകരിക്കുവാന്‍
സഹായിച്ച പ്രിയപ്പെട്ട ചുള്ളിക്കാസാറിനോട് നന്ദി പറയുന്നില്ല.

ജാക്സണ്‍കടല്‍

2009-12-31T09:28:00.000-08:00

ഒരേ നേരം
ഒരേ ദേഹം
ഒച്ചയുണ്ടാക്കിയും
കെടുത്തിയും.

അതേ ദേഹം
ഒരേ നേരം
ചൂടാര്‍ന്നും
തണുത്തും.

ആള്‍പ്പരപ്പിനെ
മൃഗപ്പരപ്പിനെ
മരപ്പരപ്പിനെ
ജലപ്പലക വച്ച്‌
ദൈവം ആണിയ-
ടിക്കും നാള്‍

ജലപ്പലക
സ്റ്റേജാക്കി
ഒറ്റയ്ക്കൊരു
പ്രേതക്കടല്‍
ആടിതിമര്‍ക്കില്ലെന്ന്
ആരു കണ്ടു.

ഇഴച്ചില്‍

2009-12-19T21:06:00.000-08:00

നനഞ്ഞെന്നു കരുതി
കണ്ണുകള്‍ തൊട്ടു നോക്കെ
വിരലുകള്‍ കയറിപ്പോയ
കുഴികളുടെ ആഴം
ഇല്ലാതായിട്ടുണ്ട്.

ഒരു ഹിംസ്രജന്തുവായ്
കടിച്ചു തുടങ്ങേ
കീറി കീറി
ചോര മാത്രമാക്കി മാറ്റാന്‍
എത്തുന്നില്ല
പഴയ ഭയങ്ങള്‍.

പിന്നില്‍ പോയതൊക്കെയും
അകലെയെന്നറീവൂ;
എങ്കിലും ഒച്ചായ് തന്നെ
ഇഴയുന്നുണ്ട്
നേരമിപ്പൊഴും.

പക്ഷിക്കോണി

2009-12-13T04:54:00.000-08:00

പണ്ട് പക്ഷികളെയാരും
കൊന്നുതിന്നാതിരുന്ന കാലത്ത്
ഉന്നതങ്ങളിലുള്ള
സ്വര്‍ഗ്ഗത്തിലേക്ക്‌ കയറുവാന്‍
പക്ഷികളെക്കൊണ്ട്
ഒരു കോണിയൊരുക്കിയിരുന്നു
ദൈവം.

ഭൂമിയില്‍ നിന്നും
പൊന്തി പൊന്തി
നിശ്ചലം നില്ക്കും
പക്ഷിപ്പടികള്‍.

സ്വര്‍ഗ്ഗം കിട്ടുന്നോര്‍ക്കെല്ലാം
പക്ഷികളേക്കാള്‍
ഭാരക്കുറവായിരുന്നു.

ക്രൗഞ്ചമിഥുനങ്ങളിലൊന്നില്‍
ശരമേറ്റ മാത്ര മുതലാകാം
പക്ഷിക്കോണിയെ പിന്നെയാരും
കാണാതിരുന്നത്.

ഇപത്രം മഞ്ഞയില്‍ പ്രസിദ്ധീകരിച്ചത്

ചോദ്യം

2009-12-08T03:38:00.000-08:00

ഇരുമ്പ് മുറിച്ചു പോയേക്കാവുന്ന
വലിയ വലിയ നിശബ്ദതകള്‍ ജലത്തിലൊ
മണ്ണിലൊ അല്ലാതെ താഴ്ന്നു താഴ്ന്നു
പോകുന്നുണ്ടൊ വേറെ ഏതെങ്കിലും
ഇടങ്ങളില്‍.

താങ്കള്‍ കണ്ണട ഊരുമ്പോഴൊ
വയ്ക്കുമ്പോഴൊ
അതല്ലെങ്കില്‍
കണ്ണട വയ്ക്കാതിരുന്ന
കാലത്തൊ കണ്ടിട്ടുണ്ടൊ
ഇത്തരം നിശബ്ദതകള്‍.

ബൂലോകകവിതയില്‍ പ്രസിദ്ധീകരിച്ചത്

പാട്

2009-12-01T00:24:00.000-08:00

ആഴം കഴിഞ്ഞും
പോകും വാക്കെ
അതിലുമാഴത്തില്‍
വെട്ടിയൊരു
പാട് കണ്ടൊ.

പ്രവാസകവിതയില്‍
പ്രസിദ്ധീകരിച്ചത്.

ബുള്ളറ്റ്ഫ്രീ

2009-11-23T22:45:00.000-08:00

ചര്‍ക്കയില്‍ ബാക്കിയായ
ഒരു നൂലിഴപോലും
നെഞ്ചില്‍ തൊട്ടുകൂടെന്ന്
ഗാന്ധിജിക്ക്
നിരാഹാരമായിരുന്നു.

നെഞ്ചു തുളയുമ്പോള്‍
നൂലിഴയും
തടസ്സമാകരുതെന്നായിരിക്കും.

ഗോഡ്സ്സെയെ
അത്രക്കും അറിഞ്ഞിരുന്നു
ഗാന്ധിജി.

കൊമ്പുകള്‍

2009-11-11T20:54:00.000-08:00

നിശബ്ദത തണലായും
പൊള്ളും വെയിലായും
ഓര്‍മ്മയുടെ പിന്നാമ്പുറമായും
ഒച്ചയോടെ കൊമ്പു കുഴല്‍
മേളമോടെ ചിലപ്പോള്‍
കൊമ്പില്‍ കോര്‍ത്തൊരു
ചെമ്പുടല്‍ പോലെയും

തര്‍ജ്ജനിയില്‍ പ്രസിദ്ധീകരിച്ചത്

കടലുപ്പ്‌

2009-11-08T00:09:00.000-08:00

ചൂണ്ടയിലൊ
വലയിലൊ പെട്ട്
ജന്മം തീര്‍ന്നിട്ടും
വേവാതെ ഉപ്പില്‍
പുതഞ്ഞു കിടപ്പുണ്ട്
കടല്‍മീനുകള്‍.

ആരും ഉപ്പിനെ
കടലുപ്പ്‌ എന്നു
പറഞ്ഞു കേട്ടിട്ടേയില്ല.
ആര്‍ക്കെങ്കിലും
ഒന്നു പറഞ്ഞൂടെ;
ഒരു നിമിഷമെങ്കിലും
കടലായ് കഴിഞ്ഞിരു-
ന്നതിന്‍ തിരപ്പെരുക്കങ്ങള്‍
ഓര്‍മ്മിച്ചെടുക്കാലൊ.

ശവത്തോല്‍

2009-10-13T22:09:00.001-07:00

അദൃശ്യമായ ഒരു ശവത്തെ
പൊതിഞ്ഞ തോലു
മാത്രമാകുന്നു ഉടല്‍.

നടക്കുകയും ഇരിക്കുകയും
കിടക്കുകയും ചെയ്യുന്ന
ഒരു ശവത്തോല്‍.

തോല്‍ മാറുന്നതും
കാണാകും ശവം.

ഏറെ കണ്ടതും അറിഞ്ഞതും
എന്റെയിശ്ശവത്തെ
നീയല്ലൊ.
നീ തന്നെ തീ വച്ചതും.

ഏഷ്യാനെറ്റ്‌ റേഡിയോ 657AM യു എ ഇ, ഒക്ടോബര്‍ 10, ചൊല്ലരങ്ങില്‍
ശവത്തോല്‍ കേള്‍ക്കാം .

ശിഷ്ടം

2009-10-01T01:18:00.000-07:00

കാറ്റില്ലാത്ത നേരം
നടന്നു പോകുമ്പോള്‍
കാറ്റിനെക്കുറിച്ചോര്‍ത്തു.

വീശിയ കാറ്റുകള്‍
വീശാനിരിക്കുന്നവ
വീശാതെ ഒടുങ്ങിയവ.

ഊതി ഊതി ഒരു കാറ്റ്
മരണം വരിച്ച
ഇടം ഏതായിരിക്കും.

നിശബ്ദമായ്
നിശ്ചലമായ്
ഏതെങ്കിലും
ഒരിടത്ത്‌ കാറ്റിന്‍
ശിഷ്ടമുണ്ടൊ;
ഒരു പിടി മണ്ണില്‍
അതില്‍ ധൂളിയായ്
തരികളായ് തീര്‍ന്ന
ശവശിഷ്ടം പോലെ.

http://puthukavitha.blogspot.com/search?updated-max=2009-09-29T11:13:00-07:00&max-results=1

ഇല്ല

2009-09-29T01:27:00.000-07:00

ഉടല്‍ മാറാതെ കിട്ടും
പുനര്‍ജ്ജന്മങ്ങളില്‍
മുന്‍ജ്ജന്മങ്ങളൊ
പ്രണയവും കടവും

അതുകള്‍ക്കപ്പുറം
ഇപ്പുറമെന്നും
വേര്‍തിരിച്ചീടുന്നു
ശിഷ്ടജീവിതത്തെ.

അന്യഗ്രഹങ്ങളായ്
എത്തിനോക്കാന്‍
വയ്യാത്തിടങ്ങളായ്
മുന്‍ജന്മകാര്യങ്ങള്‍.

ഓര്‍ക്കുന്നതേയില്ല
കാണുന്നതേയില്ല
തീര്‍ന്നു തീര്‍ന്നു പോം
ദിനങ്ങളെ പുല്‍കി-
പുല്‍കിയിരിക്കേ.

ഒന്നിനെ തന്നെ

2009-09-23T04:35:00.001-07:00

ഇന്നലെ കൊന്നതും
ഇതേ ജീവിയെ.

ഇന്നു വെറുതെയിരുന്നപ്പോള്‍
അതിനെ പുനര്‍ജ്ജനിപ്പിച്ചു;
ഇന്നു തന്നെ വീണ്ടും കൊല്ലും.

നിലനില്പ്പിന്റെ
രാഷ്ട്രതന്ത്രം അറിയുന്നതു
കൊണ്ട് ഞാനിത്
നാളെയും ആവര്‍ത്തിക്കും.
നാളെയും നീ
കൊല്ലപ്പെടും.

ഓര്‍ക്കുമ്പോള്‍
സുഖമുള്ള വേട്ട,
മാംസമോ;
തേന്‍ പോലെ.

അതുകൊണ്ടുതന്നെ
ഒന്നിനെ തന്നെ
പല തവണ കൊല്ലുന്നു,
തിന്നുന്നു.

നാഗം

2009-09-14T02:38:00.000-07:00

നേര്‍ത്തു നേര്‍ത്തുള്ളൊരു
പിച്ചളപ്പാടപോല്‍ നടവഴി നിറയെ
തളംകെട്ടിയ നിലാവുണ്ടെങ്കിലും
വലതുകാലില്‍ നാഗം
ചുറ്റിയതറിഞ്ഞതേയില്ല.

നാഗമാണെന്നറിഞ്ഞതും
ഉള്ളില്‍ ഭയം വൈദ്യുതപ്പുറ്റിളക്കി.
നാഗച്ചുരുള്‍ ഇടതുകാലിലേക്കും
പടരുന്നോയെന്ന തോന്നലിരട്ടിക്കേ
നിലംവിട്ട്‌ ആഞ്ഞാഞ്ഞു
കുടഞ്ഞു കാലുകള്‍;
ചുരുളുകള്‍ വീണു നിവര്‍ന്ന്
നിലത്തൊരു കറുത്ത രേഖയായ്
നിലാവും തുളച്ചു പോകും കാഴ്ചയില്‍
പതറി പലതായി കണ്ണുകള്‍

മണ്ണെണ്ണയും വെളുത്തുള്ളിയും കൂട്ടി
തളിയ്ക്കാനില്ലാത്ത
ഒരു നാഗക്കാട്ടിലൊറ്റക്കു
പെട്ടപോലായുറക്കത്തില്‍.

http://blothrammasika.blogspot.com/2009/08/blog-post_4104.html

ഒരാള്‍ക്ക് എത്ര ജഡങ്ങളാണ്‌

2009-09-07T11:58:00.000-07:00

ഒരു മരത്തില്‍ നിന്ന്‌
അനേകം ഇലകള്‍ പോലെ
ഒരു മനുഷ്യനില്‍ നിന്ന്‌
എത്ര നാക്കുകളാണ്‌.

അച്ചടക്കമില്ലായ്മയെ
കുറിച്ച് കോപിക്കുമ്പോള്‍
അടിയന്തിരാവസ്ഥയെ സ്തുതിച്ച്;
രാജ്യം സേച്ഛാധിപത്യത്തിലേക്കെന്ന്‌
സംശയം വരുമ്പോള്‍
എമര്‍ജന്‍സിപ്പിരീയഡിനെ
ഓര്‍മ്മിപ്പിച്ച്..

ഇയാളിനി മരിക്കുമ്പോള്‍
നാക്കിന്‌ ഒരു ജഡം
എന്ന കണക്കില്‍
എത്ര ജഡങ്ങളായിരിക്കും.

ഏതേതിടങ്ങളില്‍
എത്ര നേരങ്ങളില്‍
സംസ്ക്കരിക്കും
ഇതത്രയും.

http://www.chintha.com/node/45532

ഡിജിറ്റല്‍ ബോഡി

2009-08-15T23:09:00.000-07:00

പണ്ടൊക്കെ
തീവ്രവാദികള്‍
ഉടലില്‍ നിന്നും
തല വെട്ടിയെടുക്കുമ്പോള്‍
ശങ്കിച്ചിരുന്നോ ദൈവത്തെ;
പാപപരിഹാരാര്‍ത്ഥം
പുഴയില്‍ മുങ്ങിയിരുന്നൊ.

പിന്നെ പിന്നെ
എത്ര പെട്ടെന്നാണ്‌
ഡിജിറ്റല്‍റിവര്‍ വന്നു
പഴയതെല്ലാം ഒഴുക്കിയത്‌.

ക്യാമ്പിലിരുന്ന്‌ തീവ്രനാഥന്‍
പഠിപ്പിക്കുന്നു:
ഉടലിനെ പടമായ് കാണുക
ഡിജിറ്റല്‍ ബോഡിയായ്;
പ്രസ്സ് വണ്‍
തലയെടുക്കുന്നു
പ്രസ്സ് ടു
ബാക്കിയും
ഡിലിറ്റഡ്.

അവര്‍ കൂട്ടം കൂടി
ചിരിക്കുമ്പോള്‍
വായുവിന്‍
കണികക്കാട്ടില്‍
അക്കങ്ങളില്ലാതെ
ആത്മാക്കള്‍.

ചാന്ത്

2009-08-10T23:54:00.000-07:00

ചിങ്ങം പിറന്നാല്‍
പൂക്കള്‍ നിറഞ്ഞ്
തൊടികളൊക്കെയും
കൈകൊട്ടി പാടും പോല്‍.

ചാണകം കലക്കി
കളം മെഴുകി
ചെത്തീദളം കൊണ്ട്
മാവേലി എന്നെഴുതി
തുമ്പയുടെ പച്ചശിരസ്സില്‍
നിറയും വെണ്മയെ
ഊരിയെടുത്ത്
പാല്‍ക്കര
പിടിപ്പിക്കുന്നു.

ഉത്രാടരാത്രിയില്‍
ഓണം വിളിച്ച്
അരിമാവും കാച്ചിലും
ചേര്‍ത്ത് കട്ടിളപ്പടിയില്‍
ചാന്ത് വീഴ്ത്തുമ്പോള്‍
അറിഞ്ഞിരുന്നില്ല
ഉപ്പും ചോരയും
ചേര്‍ന്ന ചാന്തിന്‍ വരകളെ.

പാളക്കണ്ണാടി

2009-07-27T00:54:00.000-07:00

തീവണ്ടികള്‍
ചവച്ചോടി
ചവച്ചോടി
കിട്ടിയ
പാളത്തിളക്കത്തില്‍
കണ്ണാടി നോക്കാന്‍
കിടന്നതാകുമൊ
കണ്‍ തുറന്നേ
കിടക്കും
ശിരസ്സുകള്‍.

ധവളപത്രം

2009-07-21T06:08:00.001-07:00

അസ്ഥികളെ
ചുറ്റിപ്പറ്റി
ഒട്ടിക്കൂടിയ മാംസം
ഇടിയുകയൊ
അഴിയുകയൊ
അതുമല്ലെങ്കില്‍
ഉണങ്ങി..ഉണങ്ങി..

പ്ലാശിന്‍ കമ്പുകള്‍
കൂട്ടിപ്പിടിച്ച്
ധവളനിറ-
മാര്‍ന്നതൊക്കെയും
പെറുക്കിയെടുക്കുമ്പോള്‍
വെറും നുറുങ്ങുകളെ
എങ്ങിനെയാണ്‌
ധവളപത്ര-
മെന്നു പറയുക.

രണ്ടു ചിരികള്‍

2009-07-12T22:20:00.000-07:00

കൂട്ടരോടൊത്ത്
*ജയിലു കാണാന്‍ പോയതാണ്‌.

പഴയ ശിക്ഷാമുറകള്‍
നടപ്പാക്കിയിടം കണ്ടു;
അന്നത്തെ അതേ ഉപകരണങ്ങള്‍
തുറസ്സില്‍ വെയിലേറ്റിട്ടും
മഴയേറ്റിട്ടും
പച്ചപ്പോടെ ഇപ്പൊഴും.

ശേഷിക്കും സെല്ലുകളോരോന്നിലും
കയറിയിറങ്ങി അവസാനത്തെ
സെല്ലില്‍ കടന്ന്‌ അഴിയിലൂടെ
പുറത്തേക്കു കയ്യിട്ടു സാക്ഷയിട്ടു;
കുറച്ചു നേരം ഒറ്റക്കു നിന്നു
കൂട്ടുകാരെത്തി 'മോചിപ്പിക്കെ'
ചിരി വന്നിട്ടും ചിരിക്കാതെ
എല്ലാവരും.

പിന്നെ ഞങ്ങള്‍ *തൂക്കുമരം കണ്ടു
കാഴ്ച്ചക്കു വരുന്നവര്‍
പിടിച്ചു നോക്കി
പിടിച്ചു നോക്കി
കയറിനു നല്ല തിളക്കം.
കൂട്ടത്തിലൊരാള്‍ കയര്‍
കഴുത്തിലിട്ടു സ്വയം തൂങ്ങുന്നതു പോലെ
അഭിനയിച്ചു
അടിയിലെ പലകയില്‍ ആഞ്ഞു ചവിട്ടി
പലകകളെല്ലാം ഇരുമ്പു പോലെ;
അനങ്ങുന്നില്ല.

അപ്പൊഴും
ചിരി പൊട്ടിയിട്ടും
ചിരിക്കാതെ എല്ലാവരും.
--------------------------------
*അന്റമാനിലെ സെല്ലുലാര്‍ ജയില്‍
**ജയിലിനുള്ളിലെ തൂക്കുമരം

മലയാളം ബ്ലോഗുകളെ കുറിച്ച് പ്രവാസചന്ദ്രികയില്‍

2009-07-05T05:27:00.001-07:00

വേറൊരു കാട്ടില്‍ കിടന്ന്‌

2009-07-02T04:13:00.000-07:00

ചന്ദനയിലകള്‍ കൊണ്ട്
വായ്‌ മൂടിയ ഒരു കലശത്തെ
കുറിച്ചു വായിച്ചത്
രാമായണത്തില്‍ നിന്നാണ്.

ചന്ദനമരം കരയുമ്പോള്‍
കണ്ണീര്‍ച്ചൂര് എന്തായിരിക്കുമെന്നായ്
കിടന്നപ്പോള്‍ ഓര്‍ത്തത്.

കണ്ണീരായപ്പോള്‍ പിന്നെ
വരവായ്‌ അച്ഛനുമമ്മയും
പെങ്ങളും അവളും.

ചന്ദനത്തിലും ഉപ്പിലും
ആഴ്ന്നുറക്കം പിടിക്കെ
രണ്ടും ചേര്‍ന്നതിന്‍
ചൂരടിക്കുന്നോ മുറിയാകെ.

ഉണരുമ്പോഴിനി
ചന്ദനക്കാട്ടിലോ
ഉപ്പുകാട്ടിലോ
രണ്ടുമല്ലാത്തൊരു
കാട്ടില്‍ മാഴ്കുമ്പോള്‍.

പാലം

2009-06-30T21:38:00.001-07:00

നിന്ന നില്പ്പില്‍
മനുഷ്യര്‍ ഉറഞ്ഞു തീരുന്ന
ഒരു വരം ഉണ്ടെങ്കില്‍
അഭയാര്‍ത്ഥികള്‍
നദി കടക്കുമ്പോള്‍
ആള്‍പ്പാലങ്ങളൊക്കെയും
അനങ്ങാപ്പാലങ്ങ-
ളായേനെ.

പ്രതിഷ്ഠ

2009-06-24T23:37:00.000-07:00

ഉടലും തലയും വേര്‍പെട്ടിട്ടില്ല
വസ്ത്രങ്ങള്‍ എല്ലാം നല്ല പോലെ
ഒരു തുള്ളി ചോരയും പൊടി-
യാത്തൊരു മൃതദേഹപ്രതിഷ്ഠ
കാണ്മു കണ്ണാടിയില്‍; എത്ര സത്യം
നാരായണഗുരുവിന്‍ മൊഴി .

http://www.harithakam.com/ml/Poem.asp?ID=780

മറുപടി

2009-06-17T02:48:00.000-07:00

തീപ്പുറം കേറി
ഞാനിരിക്കുമ്പോള്‍
കാറ്റിനെ വേവിച്ച്
പറക്കാന്‍ വിടുന്ന
നിന്റെ കുസൃതി.

ഞാനല്ലേ സഹിച്ചോളും
എന്ന് നീ കരുതുന്നു.

ഞാനും കരുതുന്നു;
സഹിക്കും.

ഇത് നിനക്കുള്ള
മറുപടി.

ഒരു നിശബ്ദരേഖ

2009-06-06T22:40:00.001-07:00

ബലമില്ലാത്ത ഉത്തരം വീടിനുള്ളവര്‍
വീടു നിറയെ അംഗങ്ങളുള്ളവര്‍
തൂങ്ങുക മാവിലോ പ്ലാവിലോ
ആയിരിക്കും.

പുലര്‍ച്ചെ കാണുന്ന ശവം
കൈതോലപ്പായയില്‍ പൊതിഞ്ഞ്
ഉന്തുവണ്ടിയിലെടുത്ത്
വലപ്പാട് സര്‍ക്കാരാശുപത്രിമോര്‍ച്ചറി-
യിലേക്കെത്തുമ്പോള്‍
പത്തുപതിനൊന്നു മണി ആകും.

റോഡിലൂടെ നടക്കുന്നവര്‍
വേലിക്കരിലേക്കും
പീടികയ്ക്കു പുറത്ത് നില്‍ക്കുന്നവര്‍
തിണ്ണയിലേക്കും തിണ്ണയിലുള്ളവര്‍
ചുമര്‍ തൊട്ടും
ഒച്ച പൂഴ്ത്തി നില്‍ക്കും.

പൊടിയൊതുങ്ങിയ
ചെങ്കല്‍റോഡിലൂടെ
ഉന്തുവണ്ടിയുടെ വീതിയില്‍
ഒരു നിശബ്ദരേഖ
കടന്നു പോകുന്നു.
ഉച്ച കഴിഞ്ഞ് തിരിച്ചെത്തുന്നു.

ഇരുട്ടുമ്പോഴായിരിക്കും
പൂഴ്ത്തിയ ഒച്ചകളൊക്കെയും
തെക്കേപ്പുറത്തു നിന്നും
തിരിച്ചു പോവുക.

http://boolokakavitha.blogspot.com/2009/06/blog-post_06.html

ചില്ലരി

2009-06-01T23:48:00.000-07:00

അന്നം മുറിച്ച്
ഞാന്‍ ഒളിപ്പിക്കുന്നുണ്ട്
മൂര്‍ച്ചയുള്ള
ചില്ലുതരികള്‍.

ഇതു തന്നെയാകണേ
നിനക്കുള്ള
അവസാനത്തേതും.

തിങ്ങി തിങ്ങി

2009-05-28T03:50:00.000-07:00

ജലം തിങ്ങി തിങ്ങി വരുമ്പോള്‍
പുറത്തേക്കൊഴുകുവാന്‍
കഴിയുന്ന പുഴയേ
നിന്റെ ജന്മം നല്ലത്.

അഗ്നിയേ നീ തിങ്ങി തിങ്ങി
വരുമ്പോള്‍ പൊട്ടിത്തെറിച്ച്
പുറത്തേക്കാളും.

അകവും പുറവും
ഇല്ലാതാകുമ്പോള്‍
ഒഴുക്കുമില്ല
ആളലുമില്ല.

തിങ്ങി തിങ്ങി
ഇടമില്ലാഞ്ഞിട്ടാകും
*ഉടലില്‍ പൂമാല
പറ്റിക്കിടന്നതും
ഉടലോ കയറില്‍
തൂങ്ങിക്കിടന്നതും.

..................................
* ഉടലില്‍ പൂമാലയിട്ട്
തൂങ്ങിയ ഇടപ്പള്ളി.

http://harithakam.com/ml/Poem.asp?ID=787

ജഡഹത്യ

2009-05-18T22:05:00.000-07:00

ചില ഇരകള്‍
വെടി കൊള്ളുന്നതിനു
മുന്‍പേ
ജഡങ്ങളായിരിക്കും.

ജഡങ്ങളെ
കൊല്ലുകതന്നെ വേണം;
മരിക്കുന്നതുവരെ.

ശവക്കുഴികള്‍ക്കു മേല്‍
നിറയൊഴിക്കുവാന്‍
പിന്നെയെന്തിനു
മെനക്കെടണം.

പൂച്ചപ്പക

2009-05-09T04:21:00.000-07:00

ഒറ്റവീശലിന്‌
കഴുത്ത് തെറിപ്പിച്ചില്ല;
കഴുത്തില്‍ കുത്തി
ഒന്നിളക്കി വാള്‍
ഊരിയെടുത്തു.

നിലവിളിക്കാന്‍
പറഞ്ഞപ്പോള്‍
ഒച്ച മൂന്നു ഭാഗത്തൂടെ
കുറുകി.

ചിരി
രണ്ടു ഭാഗത്തൂടെ
കുടു കുടാ.

തീര്‍ന്നില്ല
ഒരു കിണ്ണം വെള്ളമെടുത്ത്
അതില്‍ കൈ മുക്കി
കൊട്ടാന്‍ പറഞ്ഞു;
കാക്ക വരാത്തതിനാല്‍
ഒടുക്കം കഴുത്ത് വെട്ടി.

വെറും പൂച്ചയും
എലിയും തമ്മിലുള്ളതാ
മേല്‍പ്പറഞ്ഞത്;
നമ്മുടെ ജീവിതം
ഇങ്ങിനെയൊന്നുമല്ലല്ലൊ.

വേറൊരാള്‍ കടലിനെ കാണുന്നത്‌

2009-05-05T01:04:00.000-07:00

ഇക്കടലിന്‍ തിരകളത്രയും
വേറൊരു കടലെടുത്ത്
നാട്ടുനീര്‍പ്പാടമായ് പരന്ന്‌
ഒച്ചയുണ്ടാക്കാതെ
തുളുമ്പാതെ.

എങ്കിലും കാണുന്നതെങ്ങിനെ
കടലിനെ കടലല്ലാതായ്
നീയോ ഞാനോ
കാണുന്നില്ലങ്ങിനെ.

നീര്‍പ്പാടം കടന്നാല്‍
വീടായെന്നും
വീട്ടിലേക്കെത്താന്‍
നേരമായെന്നും
പാടം മുറിക്കട്ടെയെന്നും
വേറൊരാള്‍
വിചാരിക്കുംപോല്‍.

പിന്നെയും വേവുക

2009-04-29T22:05:00.000-07:00

ഒരു പകലിന്റെ വെയില്‍
ഉടലിലെ ജലമത്രയും ഊറ്റുമ്പോള്‍
രാത്രിയുടെ തണല്‍
ഊറ്റിയതെല്ലാം
തിരിച്ചു തരുമൊ.

പകലിനിളവേല്‍ക്കാനല്ലൊ
രാത്രിതന്‍ തണല്‍.

പകലില്‍ വെന്തതിന്‍ ബാക്കി
രാത്രി പിന്നെയും വേവുന്നു.

രാത്രി കഴിഞ്ഞാല്‍ തിരിച്ചെത്തും
പകലേ രാത്രിക്കൊപ്പം കഴിഞ്ഞ്
നീയെന്തെല്ലാം പകുത്തു പറഞ്ഞു.
രാത്രിയേറ്റ കുളിരാറ്റാനല്ലെ
നീ വെയില്‍ ഉണ്ടാക്കുന്നത്‌.

രാത്രിയാകുമ്പോള്‍
പൊയ്ക്കൊള്‍ക..പിന്നെയും
പിന്നെയും.

വേവുക വേവുക
ഉടലേ..പിന്നെയും വേവുക.

പുലി

2009-04-26T22:30:00.000-07:00

സിംഹങ്ങള്‍
പുലികളെ തിന്നു

സിംഹാരാധന
മൂത്ത് മൂത്ത്
ലങ്ക നിറയെ
സിംഹസ്തൂപങ്ങള്‍
നിറയും.

ദഹിക്കാത്ത
പുലികള്‍ ഇനി
സ്തൂപങ്ങള്‍
തുരന്നു
പുറത്തു വരുമൊ.

http://harithakam.com/ml/Poem.asp?ID=782

പുരപ്പുറം

2009-04-24T23:37:00.000-07:00

മാവായ മാവുകളില്‍
പൂക്കളില്‍ തൊട്ടും പിടിച്ചും
ഇരുന്നും ചെറ്റപ്പുരകളുടെ
മണ്ണടുപ്പുകളിലേക്കും
നോട്ടമെറിഞ്ഞ്‌ വൃശ്ചികക്കാറ്റ്
ഒരു നുള്ളു തീപ്പൊരി
ചെറ്റയിലൊ പുരപ്പുറത്തൊ
കൊണ്ടിടും.

കാക്കക്കൂട്ടം പോലെ
മനുഷ്യര്‍ ഓടിയെത്തും
കൈ നിറയെ മണ്ണ്
ഒരു കുടം വെള്ളം..
കുളം കലങ്ങും.

പൊന്തും തീനാക്കുകള്‍ക്കൊപ്പം
എല്ലാവരുടേയും ഒച്ചകള്‍.
തീയൊടുങ്ങുമ്പോള്‍
എല്ലാമൊടുങ്ങുന്നു.

അണയാത്ത വൃശ്ചികം
അണയാത്ത പുരപ്പുറം
ഇപ്പൊഴും ഇടക്കിടെ.

മലര്‍ന്നു പറക്കുമ്പോള്‍

2009-04-20T10:07:00.001-07:00

ഇരുട്ടില്‍
വേരിടും പകലിന്റെ
ഒച്ചയായ്
നിന്റെ കണ്ണുകള്‍ .

എന്നും പഴിച്ച
നിന്നെ വീണ്ടും
പഴിക്കുന്നു
തെറ്റി വന്ന
കടല്‍ത്തുള്ളിയാണ്
നിന്റെ കണ്ണീര്‍.

നീ മലര്‍ന്നു
പറക്കുമ്പോള്‍
എങ്ങിനെയാണ്
താഴേക്ക്
കണ്ണീര്‍
വീഴുക.

*കപ്പല്‍

2009-04-18T21:40:00.000-07:00

കടല്‍ വറ്റിയ ഇടമാണ്‌
(നിന്റ്റെ കണ്ണുകളല്ല)
കടലിന്നടിയിലെ പാറയായിരുന്നു
ഈ പര്‍വതം
തുറന്നു നോക്കിയാല്‍
ജലജീവികളുടെ ഫോസിലുകള്‍
കണ്‍ടേക്കാം.
മടക്കുകളില്‍ ഇത്തിളുകള്‍
കക്കത്തോടുകള്‍ കാണാം
അടര്‍ത്തിയെടുക്കാം.
ഉപ്പുവെള്ളം താഴ്ന്നു താഴ്ന്നു
വറ്റിപ്പോയതിന്നോര്‍മ്മപ്പാളികള്‍.

ഇതിന്നുച്ചിയാണ്‌
നാടു കാക്കാന്‍ നിന്നവരുടെ ഇടം.
ഏതവനും കപ്പലുമായ്
വരുന്നതു കാണാം.

കപ്പല്‍ കാണുന്നേരം
കടലും കപ്പലും ശത്രുക്കള്‍ തന്നെ.
കടല്‍ വറ്റിച്ച് കപ്പലിനോടാന്‍
വഴിയില്ലാതാക്കാന്‍ തോന്നും.
കടല്‍ കുടിച്ചു തീര്‍ക്കുന്ന മല്‍സ്യമേ
നീ വന്നാലും എന്ന പ്രാര്‍ത്ഥന
ജനിക്കും.

അടിയിലെത്തിയപ്പോള്‍
പാമ്പു കൊത്തി നീലിച്ച
ഒരാട്ടിന്‍കുട്ടിയെ കണ്ടു
ഉച്ചിയിലിരുന്ന് കപ്പലു വരുന്നേ
കപ്പലു വരുന്നേ എന്ന് ആട്ടിന്‍ കുട്ടിയോട്
ആര് പറയാന്‍ .

കാര്‍മേഘങ്ങള്‍ ഉണ്ടാകുന്നത്

2009-04-14T10:11:00.000-07:00

ഐരാവതങ്ങളെ നോക്കി
കറുത്താനകള്‍ ചിന്നം വിളിച്ചു.

കറുത്താനകള്‍ക്കെന്തറിയാം
പാവങ്ങളെ കുത്താനല്ലാതെ
ഐരാവതങ്ങള്‍ കളിയാക്കി.

കറുത്തവന്‍ ഒറ്റകുടച്ചില്‍
പട്ടയും പഴവും ഉണ്ടച്ചോറും
ഉത്സാഹകമ്മറ്റിക്കാരും
ഉണ്ടെങ്കില്‍ എന്തൈരാവതം.
ഐരാവതങ്ങളെ നിങ്ങളുടെ
മൂത്രമൊഴിപ്പൊന്നുമല്ലട്ടോ
ഞങ്ങളുടെ മണ്‍സൂണ്‍.
വേണമെന്കില്‍ ഞങ്ങളെ
ഒരുമിച്ചു നിര്‍ത്തി മൂത്ര-
മൊഴിപ്പിക്കല്‍ നടത്തിക്കോളു
ഭാരതപ്പുഴ നിറഞ്ഞൊഴുകും.
രണ്ടു കൂട്ടരും ഒരുമിച്ചു
ചിരിച്ചു. ചിരിയുടെ ഒടുക്കം
ഐരാവതങ്ങള്‍ കറുത്താനകളെ
മേലോട്ട് ക്ഷണിച്ചു .ഒന്നുപോയ്
ക്കളയാം. ആകാശമദ്ധ്യേ
എത്തിയപ്പോള്‍ ഐരാവതങ്ങള്‍
കാഴ്ചയില്‍ നിന്നും മാറി നിന്നു.
പാവം കറുത്താനകള്‍.
വഴി യറിയാതെ ആകാശ-
ത്തലയേണ്ടി വന്നു.
ഭൂമിയില്‍ നിന്നു നോക്കിയാല്‍
കാര്‍മേഘങ്ങളായ് ഇപ്പോഴുംകാണാം.

ഒന്നുമറിയുന്നില്ല

2009-04-06T21:38:00.000-07:00

ഒരോര്‍മ്മ
വന്നു പോകുമ്പോള്‍
എത്ര ശവങ്ങളാണ്
ഉള്ളില്‍ നിന്നും
കൊഴിയുന്നത്.

വേറൊരോര്‍മ്മ
എത്തുമ്പോള്‍
പുറത്തുള്ള
പ്രേതങ്ങള്‍
ചിരിക്കുകയോ
കണ്ണടക്കുകയോ
അലറുകയോ
ചെയ്യുന്നുണ്ടോ.

പ്രണയം

2009-04-02T05:19:00.000-07:00

ഒരേ മരു തന്നെ
രണ്ടു പേര്‍ക്കുള്ളില്‍
ഉണ്ടെന്നു
നിനക്കുന്നതോ.

അങ്ങനെ

2009-03-27T11:57:00.000-07:00

ചില നേരം ഉടലില്‍
നിന്നും വിട്ടു പോകാതെ
നിഴല്‍ എന്നോട്
ചോദിച്ചിട്ടുണ്ട് ഞാനില്ലാതെ
നിനക്കാര് എന്നും
അതുകൊണ്ട് നിന്നില്‍
തന്നെ ഉരുകിച്ചേരട്ടെയെന്നും
അങ്ങനെയാണ് നിഴല്‍
ഇല്ലാതായതും ഞാന്‍
മാത്രമായതും.

ചിരിച്ചോടും മത്സ്യങ്ങളെ

2009-03-24T22:47:00.000-07:00

ഏതൊരനുസരണക്കാരനും
ഒരിക്കലെങ്കിലും
കയറു പൊട്ടിക്കും.

കടല്‍ എത്ര കാലം
മല്‍സ്യള്‍ങ്ങള്‍ക്കു
വേണ്ടി തണുത്തു കിടക്കും.
ചുടുവെള്ളത്തില്‍ ഒന്നു മേല്‍
കഴുകാന്‍ കടലും
കൊതിക്കില്ലെ.

പ്രളയത്തിലും ചിരിച്ചോടും
മത്സ്യങ്ങളെ നിങ്ങള്‍
എന്തു ചെയ്യും അപ്പോള്‍.

വിരലുകള്‍

2009-03-20T13:05:00.000-07:00

ഇന്ദ്രിയങ്ങള്‍
ഇല്ലാതാകുന്ന
നിമിഷമാണോ
നിശബ്ദത.

രണ്ടു നിശബ്ദതകള്‍
കൂട്ടിമുട്ടുമ്പോള്‍
രണ്ടു വിരല്‍ത്തുമ്പുകള്‍
തൊട്ടു നില്ക്കും.

വ്യാവസായികാടി-
സ്ഥാനത്തില്‍
നിശബ്ദതകള്‍
ഉല്‍പ്പാദിപ്പിച്ചെടുക്കുമ്പോള്‍
കമ്പോളത്തില്‍
എന്തുമാത്രം
വിരലുകള്‍.

കാണാതായവനെ കുഴിച്ചെടുക്കുന്നു

2009-03-18T09:14:00.000-07:00

കുഴിച്ചിട്ട മാംസം
പുറത്തെടുക്കുമ്പോള്‍
കാണുന്ന അതേ കറുപ്പ്
ഈ കാക്കയ്ക്കും .

പോ കാക്കേ
എവിടെയായിരുന്നാവോ
ഇതുവരെ .

അവനെ കുഴിച്ചെടുക്കുകയാണ്.
കണ്ടില്ലേ കണ്ണിന്റെയവിടെ
എന്തൊരാഴം.
മണ്ണു കേറിയിട്ടും
ആഴത്തിനെന്താ കുറവ്.

ഒറ്റ ഉടലില്‍ എത്ര
മരണങ്ങള്‍ കണ്ടവന്‍.
അവസാനത്തേതു
തന്നെ ഈ കുഴിച്ചെടുക്കല്‍.
കുഴിയില്‍ നിന്നും
എടുക്കാതെ തന്നെ
പൊളിത്തിന്‍ പേപ്പര്‍ കൊണ്ടു
പൊതിഞ്ഞു അവനെ.

എത്ര കാക്കകളാ
പോ കാക്കേ.

ശവങ്ങള്‍ പറയുന്നത്

2009-03-16T23:53:00.000-07:00

"http://uaepoets.blogspot.com/2009/03/blog-post_7746.html" >"ശവങ്ങള്‍ പറയുന്നത്" ഇവിടെ വായിക്കാം

ഉറക്കത്തിലെ ആനകള്‍

2009-03-06T12:55:00.000-08:00

കൊന്നു കൊമ്പൂരി
കുഴിച്ചിട്ട ആനകളത്രയും
രാത്രിയില്‍ എണീറ്റ്‌
നാലും എട്ടും കൊമ്പുകളോടെ
മദിച്ചെത്തി ചുട്ട കാടിനെ
പറത്തിയും കീറിയും
ഉറക്കത്തില്‍.

ആനക്കറുപ്പിന്‍
ഇരുട്ടിലൂടെ
എവിടേക്കാണുരുളുക.

വായ് തുറന്നമറിയാലും
ചിന്നംവിളികള്‍
എഴുന്നേറ്റു നില്ക്കും
വായുവിന്‍ സ്തൂപങ്ങളെ
തകര്‍ത്ത് എങ്ങിനെയാണ്
ഒരു ചെറിയ അമറല്‍
കടന്നു പോവുക.

അടിയന്തിരാവസ്ഥ

2009-03-04T23:04:00.000-08:00

എനിക്കിഷ്ടം

അടിയന്തിരാവസ്ഥയെ

ഓര്‍മ്മകളുണ്ടാക്കാതിരിക്കാന്‍

വേണം ഇനിയും

അടിയന്തിരാവസ്ഥ .

ഒരു രാജ്യത്തിനു

മാത്രമല്ല മറ്റു

പലതിനും വേണം

അടിയന്തിരാവസ്ഥ .

എനിക്ക് മൂന്നു വയസ്സുകാരി

ചിഞ്ചുമോളെയും

അറുപത്തിരണ്ടു വയസ്സുകാരന്‍

ആ പഹയനെയും

ഓര്‍മ്മിക്കാന്‍ വയ്യ.

നമ്മുടെ സര്‍വ്വേ കല്ലുകള്‍

വീടിന്റെ ഗേറ്റ് വാതില്‍ ജനല്‍

കഴിയുമെങ്കില്‍ ചുമരും

ഇതെല്ലാം അടിയന്തിരാവസ്ഥ

കൊണ്ട് തന്നെ പണിയിപ്പിക്കുക.

ഇതാണോ സുനാമി

2009-03-03T00:06:00.000-08:00

സമാന ദിശകളിലല്ലാത്ത
രണ്ടു കാറ്റുകള്‍
നടുക്കടലിന്‍
മുകളില്‍ വെച്ചു
കൂട്ടിയിടിച്ചു.

ചിറകുകളുണ്ടാ-
യിട്ടും പറന്നുയരുവാന്‍
കഴിയാതെ
നീന്തിക്കയറാന്‍
കരയിലേക്കോടി
കാറ്റുകള്‍.

ഇതാണോ
സുനാമി.

തമാശക്കാരന്‍ മരിച്ചുപോകുമ്പോള്‍

2009-03-01T21:52:00.000-08:00

ഉടല്‍ ബാക്കിയാക്കി
അവന്‍ പറന്നു പോകുമ്പോള്‍
കണ്ണീരുകൊണ്ടു
എറിഞ്ഞു നോക്കി.

മനനം കൊണ്ടു
തിരിച്ചു വിളിച്ചു.

കാക്കക്കണ്ണില്‍
നോക്കി നോക്കി നില്‍ക്കെ
ഒറ്റ പൊങ്ങല്‍ .
ശിരസ്സിന്‍ മുകളിലൂടെ
പറക്കെ ഒടുക്കത്തെ
തമാശ.

കുളിച്ചിട്ടും
ശിരസ്സു തൊട്ടപ്പോള്‍
പച്ചമണം.

ദ്രൗണിയുടെ പ്രണയം .

2009-02-24T03:14:00.000-08:00

പാപത്തിന്റെ കാക്കകള്‍
കരഞ്ഞു വെളുപ്പിച്ച പകലിതില്‍
കിടന്നു പിടയുന്നു ഞാന്‍
മൃതിയോ മൃഗതൃഷ്ണയായ്
ഇന്ദ്രിയപ്പുഴ തന്നിലോ
ചീഞ്ഞുനാറും ശവങ്ങളും.

ഒരാലിലക്കായ്‌ തപം ചെയ്യുന്ന
ലോകമേ എനിക്കായ് വരും
പ്രളയത്തെ തടുക്കൊല്ല
പാപിയെപ്പോഴും പാപി തന്നെ
പാപബോധപീഡനത്തിന്മേലെ
എത്തില്ലെന്നറിക വെന്തുരുകു-
മസ്ഥിയും ഞെരമ്പും
ചലം കെട്ടിയ ഇരുകണ്ണും.

ഖഡ്ഗം വീശി നശിച്ചാലും
കിളുര്‍ക്കുന്നല്ലോ ആലുകള്‍
എനിക്കായ് വരും പ്രളയമേ
പ്രണയിക്കുന്നു‌ നിന്നെ ഞാന്‍ .

മരുദേശപ്പൂരം

2009-02-22T07:21:00.000-08:00

കണ്ട പൂരങ്ങള്‍
കണ്ണ് നിറയെ
ചെണ്ടക്കാര്‍ കൊമ്പുകാര്‍
ഇലത്താളം
കുത്തുവിളക്ക്
തിടമ്പേറ്റി കരിമല
ചന്തത്തോടെ.

പൊടിപ്പൂരം
മൊഴിപ്പൂരം
ഒഴുക്കിന്‍ പൂരം
ഒരു മുഖം
ഒരു നോക്ക്
കൊളു‌ത്തുവാനില്ലാതെ
ഇല്ലായ്മപ്പൂരം.

ഇവിടെ മരുദേശത്തും
മേളം മുറുകുന്നു
ചെണ്ടക്കോലുകള്‍
കത്തിയ പോലെ
തീനാക്കുകള്‍ വായുവില്‍
പൊന്തിയും താഴ്‌ന്നും
ദഹിക്കേ നിറമറ്റലകളായ്
മൃഗതൃഷ്ണകളൊരുക്കുന്നു
മരുദേശപ്പൂരം.

പ്രളയം.

2009-02-18T11:12:00.000-08:00

തീയിലേക്ക് ഒരു ഹൃദയം
എടുത്തു വെക്കുമ്പോള്‍
തീ ജലമായ് മാറണം
എങ്കിലേ അതു‌ ഹൃദയ -
മാണെന്ന് വിശ്വസ്സിക്കാവു.

എന്നു‌ കരുതി
ഭൂമിയുടെ ഹൃദയം
എടുത്തു തീയില്‍ വെച്ചാല്‍
എന്താകും സ്ഥിതി .

നിറയെ ജലം.

ശവങ്ങള്‍ പറയുന്നത് .

2009-02-17T11:37:00.000-08:00

കടല്‍ക്കരയില്‍ കാറ്റു-
കൊള്ളും ശവങ്ങളൊക്കെയും
പിന്നോട്ടടിക്കുന്ന
തിരകളെ കണ്ട്
എഴുന്നേറ്റിരുന്നു.

എന്തിനാണ് ഇനിയും കര ;
പുതിയ ശവങ്ങള്‍ക്ക്
വന്നിരിക്കാനോ .

കടലില്‍ പകുതി
താഴ്ന്ന സൂര്യന്‍
മുഴുവനുമായ്
മുകളിലേക്ക് വന്നു.

എന്തിനാണ് വീണ്ടും
പകല്‍ - കണ്ണടക്കാതെ
ഉറങ്ങി കിടക്കാനോ .

ഭ്രാന്തീയം .

2009-02-17T03:32:00.000-08:00

വഴിക്കീറുകള്‍ അവസാനി-
ക്കുന്നിടത്ത് തുടങ്ങുന്നു
ദൈവം തന്ന രക്ഷ.
ഭ്രാന്ത് .

മറവിയും ഓര്‍മ്മയും
എന്തെന്നറിയാതെ
ഉടല്‍ മാറാതെ
കിട്ടിയ രണ്ടാം ജന്മത്തില്‍
വഴി വിട്ടു മാറാത്ത
നിഴലിനെ ഓടിച്ചിട്ടു
തീ കൊടുത്തു
നിഴലില്‍ നിന്നും പടര്‍ന്ന
തീയിനെ നാടു മുഴുവന്‍
കൊണ്ടു നടന്നു
ഭ്രാന്തന്‍.

എന്റെ ജന്മത്തെ
കടലിലൊഴുക്കുന്നത്
ഞാന്‍ കണ്ടു.
കടലിലും കുടത്തിലും
ജലമൊന്നു തന്നെയാകുമ്പോള്‍
ആക്കൊല്ല കടലിനെയുടച്ച്
കുടത്തിലെന്ന് പറഞ്ഞ്
കടലുമായ് ഞാനോടുന്നു .

നിനക്കു വേണോ
ഇക്കടലും.

അറിയാക്കടല്‍

2009-02-13T21:28:00.000-08:00

എരകപ്പുല്ലുകള്‍ നട്ട്
ഹൃദയതീരം പച്ചയുടുപ്പിച്ചു.
മൂര്‍ച്ചയുള്ള പച്ചയില്‍ തട്ടി
മഞ്ഞിന്‍ തുള്ളി മുറിഞ്ഞു പോയ് .

നിന്റെ വിരല്‍ത്തുമ്പുകൊണ്ടൊന്നും
എന്റെ നെഞ്ചു തണുക്കില്ല.

സാന്നിദ്ധ്യമറിയിക്കാത്ത
ഒരു കടല്‍ പിന്നില്‍
കടല്‍ തീരും വരെയൊന്നും
തിരമാല വേണ്ടെങ്കിലും
ഇത്തിരിയുയര്‍ന്നു താഴ്ന്നാല്‍
നിവരുവാനാകില്ലെനിക്ക് .

കടല്‍ തട്ടി ഹൃദയം
തകരുമ്പോഴേക്കും
വിരല്‍ത്തുമ്പു
മാറ്റണം നീ.

സ്വപ്നവാല്‍സല്യം.

2009-02-12T05:08:00.000-08:00

ഏറെ പഴകിയൊരോര്‍മ്മ
രാത്രി വന്നു സ്വപ്നത്തില്‍
അടുത്തു‌ കണ്ടു മറന്നാലും

മായാത്തൊരു വാല്‍സല്യത്തെ
കണ്ടു കൊതി തീരും വരെ
അറിഞ്ഞതേയില്ല സ്വപ്നമായിരുന്നെന്ന്.

ജാഗ്രത്തിന്‍ ഭൂമികയില്‍
കിതച്ചെത്തുന്നു തീവണ്ടി ;
അടര്‍ന്നു തീരുന്നു ദേഹപ്പുറ്റുകൾ
അടിഞ്ഞു കേറെ ഒന്നിളകി
നീങ്ങി ഊര്‍ജ്ജമാര്‍ജ്ജിച്ച്
കുതികുതിച്ചോടുന്നു തീവണ്ടി.

നഗരനിരത്തില്‍ നിഴലും
താഴാതെ വഴി
കാണാതറിഞ്ഞും
പിന്നെയും ദേഹപ്പുറ്റുകൾ
ഒഴുകും തിരക്കില്‍
മേവുമ്പോള്‍ ബാക്കിയാകുന്നു
മനസിലിപ്പോഴും
രാത്രിയിലെ സ്വപ്നവാല്‍സല്യം.